សៀមរាប៖ មន្ទីរពេទ្យជ័យវរ្ម័នទី៧ (គន្ធបុប្ផាទី៣) ខេត្តសៀមរាប បានណែនាំដល់ឪពុកម្ដាយប្រុងប្រយ័ត្នចំពោះការដាក់សារធាតុរាវដែលមិនមែនសម្រាប់ហូបក្នុងដបទឹកដែលអាចឱ្យកុមារភ័ន្តច្រលំផឹកបណ្ដាលឱ្យមានគ្រោះថ្នាក់។ ការណែនាំគឺបន្ទាប់ពីមន្ទីរពេទ្យនេះបានជួយដល់កុមារាម្នាក់ដែលបានច្រលំផឹកជ័រទឹកបិទទូក។

ករណីនេះបានកើតឡើងលើកុមារាអាយុ ២ខួប ៧ខែម្នាក់មកពីស្រុកបរិបូរណ៍ ខេត្តកំពង់ឆ្នាំង បានបញ្ជូនមកមន្ទីរពេទ្យសង្គ្រោះកាលពីថ្ងៃទី១៦ ខែមករា ឆ្នាំ២០២៣ ក្រោយត្បៀតបំពង់អាហារ មិនអាចបរិភោគទឹកបបររាវចូលបាន ដោយសារច្រលំផឹកជ័រទឹកបិតទូករយៈពេល ៨ខែកន្លងមក។

បច្ចុប្បន្នកុមារាម្នាក់នេះត្រូវបានក្រុមគ្រូពេទ្យជួយសង្គ្រោះពង្រីកបំពង់អាហារជូនរួចរាល់ដែរ។ មន្ទីរពេទ្យគន្ធបុប្ផាផ្តល់ការព្យាបាលទាំងអស់គឺមិនគិតថ្លៃ សំរាប់មនុស្សទាំងអស់ដោយគ្មានការរើសអើង។

សូមអរគុណ ចំពោះការគាំទ្រ និងការបរិច្ចាគពីសប្បុរសជន ទាំងអស់ដែលភាគច្រើនជាប្រជាជនស្វីស និងប្រជាជនកម្ពុជា៕